Nýggjársbál ávirkað av veðrinum

Nógv nýggjársbál vera uttan iva fyrireikaði til í annaðkvøld.

Millum aðrar Tórshavnar kommuna og Klaksvíkar Kommuna heita á sínar borgarar um at boða frá, um skipað verður fyri nýggjársbál.

Søkjast skal um loyvi frá kommununum, ið síðani góðkenna nýggjársbálini við ávísum treytum.

Eitt nú er bert loyvi at brenna reinan, óviðgjørdan og turran við, og eisini skulu nýggjársbál vera í mesta lagi tríggjar metrar í tvørmát og tveir metrar í hædd.

Fer støddin uppum, skal sløkkiliðið góðkenna bálið við sýni á staðnum. 

Og ein onnur treyt, sum kann vera torfør at lúka í annaðkvøld, er veðrið. 

Í treytunum fyri nýggjársbál stendur, at veðrið skal vera til vildar og vindferðin skal í mesta laga vera 15 m/s.