Flokkurin verður niðurlagdur, men forkvinnan heldur fram í politikki

Flokkurin Nye Borgerlige verður niðurlagdur, men forkvinnan, Pernille Vermund, ætlar ikki at gevast í politikki. 

Hon vil tó ikki siga, hvønn flokk hon ætlar sær uppí, og fyribils verður hon uttanflokka í fólkatinginum. 

Pernille Vermund heldur, at tað eru ov nógvir borgarligir flokkar í fólkatinginum.

- Vit skulu endurreisa borgarliga Danmark, og tørvur er at savna øll tey góðu borgarligu fólkini, men í færri flokkum, sigur hon.

Bara tveir eftir

Nye Borgerlige fekk seks sessir á fólkatingsvalinum 1. november 2022.

Men ósemjur hava gjørt, at fleiri eru annaðhvørt farin ella koyrd úr flokkinum, og í løtuni eru bara tveir fóllkatingslimir eftir. Teir vera nú uttanflokka í fólkatinginum.

Sambært donskum miðlum hava Liberal Alliance, Vinstriflokkurin og Danmarksdemokratarnir, sum hoyra til borgarliga veingin í fólkatinginum, dyrnar á gloppi at fáa fólkatingslimirnar hjá Nye Borgerliga uppí hjá sær.