Løntakararnir settu met í desember

Í desember í fjør vóru 1,4 prosent fleiri løntakarar í Føroyum enn í desember 2022.

420 fleiri løntakarar vóru í desember í fjør enn í desember 2022. 

Løntakaratalið í desember í fjør var 28.740, og tað er met, skrivar Hagstovan.

Lutfalsliga fleiri kvinnur eru komnar aftrat í løntakaraskaranum.

Í desember vóru 14.700 menn løntakarar og 14.000 kvinnur.

Vøksturin hjá kvinnum er 2,1 prosent og 0,8 prosent hjá monnum.

Størsti vøksturin er í  byggivinnununi og í almennari tænastu.

7,6 prosent útlendskir løntakarar

Ein løntakari er í hesum høpinum millum 16 og 74 ár, fær A-inntøku og býr í Føroyum, tá hann ella hon fáa løn.

Útlendskir ríkisborgarar gerast fleiri í løntakaraskaranum.

Í desember í fjør vóru 7,6 prosent av løntakarunum útlendskir ríkisborgarar. 

Í desember 2022 vóru sjey prosent útlendingar. Fyri fimm árum síðani var talið 4,5 prosent. 

Løntakaraskarin var góð 400 fólk størri í desember í fjør enn í desember 2022.

Útlendskir ríkisborgarar eiga næstan helvtina, 44 prosent, av vøkstrinum.