Príseftirlitið kemur, tá lógin er avgreidd

Príseftirlitið verður skipað, tá løgtingið hevur avgreitt lógaruppskotið, sum var lagt fyri tingið fyri jól.

Lógin kemur í gildi dagin eftir, at hon er kunngjørd.

Tað sigur Høgni Hoydal, landsstýrismaður, í svari til Jóhannis Joensen, løgtingsmann, sum hevur spurt um málið.

Sambært uppskotinum, skal Kappingareftirlitið hava eftirlit við prísum, við tí endamáli at skapa virkna kapping.

Virkisøkið hjá Kappingareftirlitinum fevnir um øll sløg av vinnuvirksemi og almennum stuðli til vinnuvirksemi um at landið, tó við ávísum undantøkum.

Mvg-frítøka

Jóhannis Joensen spurdi eisini, um eftirlit verður við mvg-frítøkum, t.d. á gerandisvørum, grønum orkusparingum og elbilum.

Høgni Hoydal sigur, at við uppskotinum, sum nú er lagt fyri tingið, er ætlanin at veita Kappingareftirlitinum fleiri heimildir og at víðka virkisøkið í kappingarlógini, so betri eftirlit fæst við prísi og betri amboð at skapa virkna kapping. 

Upskotið um príseftirlit sæst her.