Champions League: Elias fær antin Zagreb ella Montpellier

Elias Ellefsen á Skipagøtu og THW Kiel skulu spæla ímóti HC Zagreb ella Montpellier HB í Champions League-fjórðingsfinaluni síðst í apríl

Kiel og Aalborg spældu seg beinleiðis í fjórðingsfinalurnar úr bólki A

Mynd: Ritzau / Scanpix

Símun Christian Olsen

08.03.2024 - 11:45

Mikukvøldið tryggjaði THW Kiel sær 1. plássið í sínum bólki í Champions League við tryggum sigri á Zagreb.

Elias Ellefsen á Skipagøtu sat uttanfyri við skaða.

Eftir síðstu dystirnar í bólkaspælinum í gjárkvøldið er greitt, at føroyski spælskiparin og liðfelagarnir í týska stórfelagnum skulu spæla ímóti antin RK Zagreb ella Montpellier í CL-fjórðingsfinalunum, sum verða síðst í apríl.

Tey bæði liðini hittast nevniliga í playoff-umfarinum, sum er á skránni síðst í mars.

Aalborg endaði á 2. plássi í bólki A, meðan Magdeburg og Barcelona spældi seg beinleiðis í fjórðingsfinalurnar úr bólki B.

Eydnast tað Kiel at vinna fjórðingsfinaluna, bíðar sonevnda Final4-endaspælið í Køln í juni.

cl-spael.jpeg

Elias Ellefsen á Skipagøtu nærkast av álvara Champions League-endaspælinum í Køln. Kiel má metast sum favorittur í fjórðingsfinalunum ímóti antin Zagreb ella Montpellier.