Starvsfólk á tómum dagstovnum

Í Vága kommunu sigur Jóhan Hendrik Ellefsen, kommunustjóri, at hóast børn ikki eru á dagstovnunum, so hava starvsfólkini eina rúgvu av øðrum arbeiðsuppgávum, sum skulu gerast hesa tíðina.

Hann sigur, at starvsfólkini framvegis fáa løn frá kommununi hesa tíðina, so má eisini arbeiðast fyri lønina.

Spurdur um, hví tað ikki er loyvt hesum starvsfólkum at taka egnu børn við til arbeiðis - børn sum noyðast at vera heima, tí tey eisini eru rakt av verkfallinum, sigur hann soleiðis:

- Vit hava stongt dagstovnarnar fyri børnum, fyri at tað skal vera so nøkulunda arbeiðssamt, hóast ongin er at vaska hølini. Tí ber ikki til at loyva øðrum børnum - børnum hjá starvsfólkum - inn á stovnarnar hesa tíðina verkfallið er, sigur Jóhan Hendrik Ellefsen, kommunustjóri í Vága kommunu