Sólfríð og Spírar fingu ársins herðaklapp

Á hvørjum ári gevur Kristiliga Lurtara- og Hyggjarafelagið eitt herðaklapp til ein persón, sum hevur virkað fyri góðum og sømiligum sendingum.

Ársins herðaklapp fekk Sólfríð Maria í Rók fyri hennara arbeiði við at gera Spírar, sum er ein digitalur sunnudagsskúli.

Í grundgevingini stendur m.a.: "Sólfríð hevur gjørt og ger eitt megnar arbeiði við digitalum sunnudagsskúla, sum kallast Spírar. Her liggur nógv orka, hugskot og arbeiði, sum Sólfríð stendur aftanfyri og ger stóran part av sjálv. Hetta er ein so góður og inspirerandi sunnudagsskúli, sum øll børn í landinum og uttanlands hava møguleika at síggja og hoyra. Fantastiskt arbeiði. Hon hevur veruliga uppiborið ársins herðaklapp."

Tað var í 2016, at Sólfríð Maria og Rógvi Brekku Dam fingu eitt hugskot, at skapa føroysk tilfar til børn, sum skuldi vera uppbyggjandi, mennandi og við einum góðum boðskapi. Lært verður úr bíbliuni við góðum hugflogi.

Í 2018 komu fyrstu partarnir av Spírum út, og restin í 2019. Nógv av arbeiðinum er sjálvboðið, men nú hevur Bíbliufelagið yvirtikið Spírar við tí fyri eyga at finna fíggingina.

Ætlanir eru um at gera fleiri røðir av Spírum tey næstu árini.

Til ber at lesa meira um Spírar á spirar.fo, har tað eisini ber til at stuðla endamálinum. Sendingarnar kunnu síggjast á youtube her.

Morgunsendingin hitti Sólfríð Mariu í Rók og Una Næs. Samrøðan kann hoyrast niðanfyri: