Byggisamtyktin broytt til frama fyri elbilar

Almenna byggisamtyktin skal broytast, so krøvini um løðingarstøðir til elbilar vera herd, hevur Tórshavnar býráð samtykt.

Uppskotið um broytingina liggur alment frammi til 18. juli, so fólk kunnu koma við mótmælum ella broytingaruppskotum.

Longu í 2021 heitti Elbilafelagið á allar kommunur um at fáa áseting í byggisamtyktirnar, um at krevja løðingarstøðir, tá bygt verður.

Uppskotið um broyttu byggisamtyktina, sum býráðið í Havn einmælt hevur samtykt, krevur fleiri løðingarstøðir á bilplássum við íbúðarbygningar. 

Eisini er krav um løðingarstøðir á øðrum stórum bilplássum.

Tær skulu koma í sambandi við nýbygging ella umvæling.

Krøvini eru tey somu sum í Danmark.