Víkingur tók týðandi fet ímóti meistaraheitinum

Olaf Bárðarson og Finnur Justinussen skutu málini, tá Víkingur vann 2-0 í toppdystinum ímóti HB í Sarpugerði í gjár.

Við sigrinum eru teir ljósabláu seks stig frammanfyri HB í toppinum av Betrideildini, sum nú fer í summarsteðg. Liðskiparin hjá Víkingi, Atli Gregersen, hevði kortini ongan hug at fara á flog.

 - Hetta er ikki ein spurtur, hetta er eitt maraton, segði superveteranurin.

 - Seks stig er einki. Vit hava sjálvir roynt at verið nummar átta ella níggju, tá eini fýra ella fimm umfør vóru eftir, og eru blivnir føroyameistarar. Men eg skal ikki lúgva. Sjálvandi er tað deiligt, at tað ikki stendur á jøvnum.

HB oyðslaði - Víkingur revsaði

HB var annars vandameira liðið, áðrenn málini komu. Áki D. Samuelsen og Mikkel Dahl høvdu báðir góðar royndir, men antin skutu teir framvið, ella stórbjargaði Bárður á Reynatrøð.

Tað var júst eftir eina slíka bjarging, at Víkingur legði seg á odda í 74. minutti. Olaf Bárðarson var sendur ígjøgnum, og einsamallur ímóti Teiti Matras Gestsson var hann ísakaldur.

Nakrar fáar minuttir seinni økti Finnur Justinussen, tá Samuel Chukwudi kiksaði við eini afturlegging.

 - Vit hava nokk av kjansum til at vinna, men so stressa vit eitt sindur ov nógv í seinna hálvleiki og vilja tað ov nógv, og tað enda við at teir fáa tvey mál og avgera dystin, segði HB-miðvallarin, Hanus Sørensen.

_g1a1191.jpg

KÍ eltir HB

Magne Hoseth var aftur í Klaksvík - nú sum venjari hjá B36, sum vitjaði - men hann fekk ikki góða móttøku á sjálvum vøllinum.

Tað gekk javnt á á nýggja graslíkinum í fyrra hálvleiki, sum endaði 1-1, men eftir steðgin skoraði KÍ tríggjar ferðir, áðrenn útiliðið fekk minkað um munin í yvirtíðini.

KÍ er nú bert trý stig aftanfyri HB í dystinum, sum fyribils snýr seg um 2. plássið.