Trump fyri drápsroynd

Donald Trump var seint í gjárkvøldið føroyska tíð úti fyri eini drápsroynd á einum veljaratiltaki í amerikanska statinum Pennsylvania.

Pensylvania er ein av sokallaðu “svingstatunum”, har bæði valevni kunnu vinna. 

So skjótt sum skotini hoyrdust var Trump umringaður av fólki frá Secret Service, sum fingu hann inn í ein bil og av staðum.

Forsetavalevnið var rakt í ovara partin av høgra oyra og sá út til at bløða illa.

Tvey fólk lótu lív, og ein av teimum er sambært Secret Service 24 ára gamli gerningsmaðurin. Umframt tey, sum lótu lív, vórðu tvey særd í hendingini.

Stutt eftir hendingina boðaði talsmaðurin hjá Donaldi Trump, Steven Cheung, at Trump hevði  tað fínt, og var til kanningar á einum sjúkrahúsi í Pennsylvania.