Stjórin fyri amerikonsku fregnartænastuni sagt seg úr starvi

Altjóða miðlar skriva nú, at Kimberly Cheatle, stjóri í Secret Service, hevur sagt seg úr starvi. 

Sambært danska DR, so hevur AP-tíðindastovan sæð ein teldupost frá Cheatle til starvsfólkini í Secret Service, har hon kunngerð, at hon hevur sagt seg úr starvi. 

Hon skrivar, at tað er við tungum hjarta, at hon hevur tikið trupulu avgerðina at siga seg úr starvinum.  

Joe Biden, forsetin, hevur í tíðindaskrivi eisini takka Cheatle fyri hennara tænastu, og hann sigur, at hann ætlar sær at velja ein nýggjan stjóra fyri Secret Service skjótast gjørligt. 

Kimberly Cheatle

Viðgekk ábyrgd

Kimberly Cheatle bleiv í gjár avhoyrd í einari hoyring í Kongressini um morðroyndina á Donald Trump undir einum veljarafundi 13. juli.

Amerikonsku politikararnir vóru ikki mjúkir við Cheatle undir avhoyringini og fleiri kravdu, at segði upp á standandi fót, men tað noktaði hon í gjár. 

Men hon viðgekk, at morðroyndin móti Trump var størsti feilur í søguni hjá amerikonsku fregnartænastuni í fleiri áratíggju. 

Donald Trump bleiv raktur í oyra, tá skotið varð eftir honum. Ein áskoðari lat lív, og tveir blivu løstaðir.