Hiddenfjord eigur størstu sólorkulundina

Ein umráðandi partur í grønu tilbúgvingini er at framleiða grønan streym, sigur Sjúrður Ferjá, orkumennari á Hiddenfjord.

Grøna tilbúgvingin er eitt av málunum hjá fyritøkuni, sum heldur tað vera teirra etiska ábyrgd at hugsa um umhvørvið.

828 sólpanel, eru seinastu tveir mánaðirnar sett á tekjurnar á tveimum bygningum á smoltstøðini á Fútakletti. 

Sólpanelini gera streym til tað, ið svarar til  streymnýtsluna hjá 40 húsarhaldum um árið, sigur Sjúrður Ferjá.

Fleiri stig

Tað verða enn fleiri sólpanel at síggja á smoltstøðini á Fútakletti, tí aftaná summarfrítiðina verður farið undir at seta sólpanel á fleiri av tøkunum.

Sjúrður Ferjá vísur eisini á at fleiri stig eru tikin, eitt nú at skifta oljubilar út við el bilar og skifta til meira burðadygt fóður.