Vil ikki vera í varðhaldi longur

Maðurin, sum var tikin fyri álopið á eina kvinnu á gøtuni við Sandá á Argjum, fekk í Føroya rætti í gjár varðhaldsfongslingina longda fýra vikur, sum politiið bað um.

Men hann kærdi úrskurðin til Eystara landsrætt, sum ikki hevur svarað enn.

Tað var sunnukvøldið tann 28. apríl, at ein kvinna var álopin á gøtuni við Sandá, eystan fyri fótbóltsvøllin á Argjum.

Ein maður var eitt korter eftir álopið tikin í kirkjugarðinum við Velbastaðvegin.

Skuldsettur fyri álopið

Maðurin, sum er skuldsettur fyri álopið, noktar seg sekan.

Maðurin hevur verið í varðhaldi síðani, hann var tikin 28. apríl.

Varðhaldið var longt í fýra vikur tann 25. juni.

Tað góðtók maðurin sjálvboðin, so hann skuldi ikki í rættin tá. 

Men í gjár var rættarfundur, og maðurin góðtók ikki, at varðhaldsfongslingin var longd. 

Men hann kærdi úrskurðin til Eystara landsrætt, sum ikki hevur svarað enn.