Maskinmeistarfelagið í Fasta gerðarrætt við Reiðarafelagnum og reiðaríi

Maskinmeistarafelagið hevur drigið reiðaríið Faroe Origin í Runavík í Fasta gerðarrættin.

Felagið ivast ikki í, at tað er í stríð við sáttmálan, at felagið ikki fær neyðugu skjølini frá Faroe Origin at kanna, um oljunýtslan hjá trolarunum hjá reiðarínum er avroknað í samsvari við sáttmálan.

Felagið sigur tað eisini vera sáttmálabrot, at reiðaríið letur manningina rinda part av ísmaskinunum í skipunum.

Talan er um trolararnar Heyk, Falk, Bak og Stelk.

Orsøkin til, at Maskinmeistarafelagið fer í Fasta garðarrætt, er illgruni um óreglusemi.

Krøvini í kæruni eru um vantandi innlit í roknskaparskjøl, frádrátt í manningarhýrunum fyri oljuútreiðslur og frádrátt fyri avdráttir fyri ísmaskinur.

Tá verkfallið var

Maskinmeistarafelagið er saman við Føroya Skipara- og navigatørfelagi eisini í orrustu við Faroe Origin í einum øðrum máli.

Tað málið er um landingar uttanlands hjá Heyki, Falki, Baki og Stelki, tá arbeiðarafeløgini vóru í verkfalli.

Tey bæði manningarfeløgini halda seg ikki hava fingið nóg gott innlit í avreiðingar og avrokningar hjá trolarunum.

Tey hava gjørt greitt, at seinasta orðið ikki er sagt í hesum málinum, sigur Maskinmeistarafelagið í tíðindindaskrivi.

Fyri einum mánað síðani sendi Maskinmeistarafelagið Fasta gerðarrætti kæru móti Føroya reiðarafelagi um tað sama, sum Faroe Origin nú er kært fyri.