Ónøgdur verji: "Paul Watson viðfarin sum ein brotsmaður"

Julie Stage, sum er verji hjá Paul Watson, er ónøgd við rættarfundin hjá Watson í Nuuk í gjár, har avgjørt varð at leingja varðhaldsfongslingina av honum til 5. september.

Sermitsiaq skrivar, at verjin hjá Paul Watson er sera ónøgdur við, at tey ikki sluppu at vísa eitt filmsbrot úr sendirøðini Whale Wars, sum eftir øllum at døma skal prógva, at Paul Watson ikki er sekur í einari av ákærunum, sum Japan hevur sett fram móti honum.

Verjin Julie Stage er eisini ónøgd við, at eingin tulkur var, sum kundi umseta fyri Paul Watson. Fleiri fólk í rættarhølinum royndu seg sum tulkar, men tað riggaði illa, og til endans mátti Julie Stage sjálv umseta so hvørt og greiða Paul Watson frá, hvat bleiv sagt.

Vildi hava Watson á hotell at sita

Og verjin er eisini ónøgdur við, at Paul Watson er lagdur í hondjørn og sum heild verður viðfarin sum ein brotsmaður.

Heitt varð á dómaran um at loyva Paul Watson at búgva á hotelli afturfyri, at passið verður tikið frá honum, so leingi hann er í Grønlandi, í staðin fyri at sita í varðhaldi saman við dømdum fólkum, men tann áheitanin varð ikki gingin á møti.

Nýggjur rættarfundur er ásettur at vera 4. september.