Knívstunga í Reykjavík kravt eitt mannalív

Skúla- og frítíðarráðið í Reykjavík heitir í brævi á øll foreldur um at tosa við síni børn um vandarnar við at hava knív uppi á sær. Orsøkin er álopið, har ein 16 ára gamal drongur á mentanarnáttini í Reykjavík seinasta vikuskiftið stakk trý fólk, av teimum fekk ein 17 ára gomul genta álvarsligar løstir, og doyði av sárum sínum í gjárkvøldið.

15.000 húski hava fingið teldupost frá Reykjavíkar skúla- og frítíðarráði í sambandi við, at ung ganga við knívi. Har stendur, at seinastu mánaðirnar hava børn gingið við knívi í skúla og frítíðarstovni, og tað kann ikki góðtakast. Henda gongdin skal steðgast nú.

- Vit mugu taka slíkar hendingar í álvara. Og tað hava okkara fólk gjørt. Foreldur vera kunnað um málið, og vit fara síðani at melda málið til barnaverndina og løgregluna, og tað er fyri at vísa álvaran í málinum, og at vit skulu standa saman um tiltøk, fyri í roynd og veru at siga stopp, her til og ikki longur, kæru børn og ung. Hetta gongur ikki longu, sigur Helgi Grímsson, leiðari í Reykjavíkar skúla- og frítíðardeild, í teldubrævinum.

Ikki er loyvt at hava vápn uppi á sær í almenna rúminum, og kriminelli lágaldurin er 15 ár. Brot kunnu vera sektað ella fongsul upp í fýra ár, skrivar íslendska kringvarpið RÚV.