Uppsøgnin verður ógildað - Glasir skal rinda møguligt endurgjald

- Avgerðin frá 1. juli 2024 at ógilda uppsøgnina verður ikki broytt, skrivar Barna- og útbúgvingarmálaráðið í brævi til Unu Joensen, rektara á Glasi, 29. august.  

Sostatt stendur avgerðin hjá ráðnum við um at ógilda uppsøgnina av Elsu Mariu Holm Olsen, útbúgvingarstjóra. 

Útvarpið hevur fingið hendur á brævinum.

Barna- og útbúgvingarmálaráðið, BUMR, hevur umframt sína egnu meting av málinum, eisini fingið uttanhýsis sakførara at gera meting av, um talan er um feilir, sum kunnu grundgeva fyri, at avgerðin 1. juli verður ógildað, og málið tikið upp til nýggja viðgerð.

Avgerðin er send pørtunum til hoyringar, og BUMR metir ikki, at partanir í seinastu viðmerkingunum hava víst á viðurskifti, sum kunnu broyta niðurstøðuna.

Una Joensen, trappuverkfall á Glasi, næmingar á Glasi, Glasir,

Frítekst tagging: 

Una Joensen rektari á Glasi

Trappuverkfall á Glasi

Næmingar á Glasi

Glasir

Una Joensen er rektari á Glasi. (Mynd: Bjarni Árting Rubeksen)

Starvsfólk ikki tikin upp á ráð

BUMR sigur, at tilgongdin í málinum frá byrjan ber brá av, at rektarin hevur tikið avgerð um leist og úrslit, áðrenn eitt nú starvsfólk og álitisfólk vóru tikin við upp á ráð.

- Tað hevði verið meira skynsamt, um rektarin hevði inndrigið starvsfólk sum eitt tað fyrsta í tilgongdini til ein einfaldari bygnað uttan at siga, hvussu vegurin hagar skuldi verða. So hevði rektarin tryggjað sær breiðari undirtøku, sigur BUMR í svarskrivinum til Unu Joensen.

Viðvíkjandi útsøgnini um, at rektarin hevur sagt ósatt, metir BUMR ikki, at rektarin hevur talað ósatt fyri aðalstjóranum undir samrøðuni 5. januar í fjør, men at talan er um misskiljing. 

- Hetta átti kanska at hava verið tikið við í ætlanarskriv okkara, ásannar ráðið í brævinum.

Barna- og útbúgvingarmálaráðið

Barna- og útbúgvingarmálaráðið.

Málið lokað

Niðurstøðan hjá BUMR er, at grundarlag er ikki fyri at broyta avgerðina.

Ráðið er kærumyndugleiki í sambandi við uppsøgnina, og málið er nú lokað.

Brævið endar við boðum um, at Glasir skal taka stig til samráðing og rinda møguligt endurgjaldskralv,  í samstarvi við Undirvísingarstýrið.

Poul Geert Hansen, aðalstjóri, hevur skrivað undir brævið.