Skal ólógliga tilflytingin steðgast er neyðugt við víðfevndum tiltøkum

- Tey, sum halda, at marknaeftirlitið minkar tilflytingina, skapa eina vón, sum ikki heldur, sigur Gerald Knaus, granskari, í samrøðu við týsku útvarpsstøðina Deutschlandfunk.

Hóast mørkini eru opin í Schengen, er longu eftirlit við fleiri av teimum níggju marknaliðnum við týska landamarkið, m.a. móti Póllandi. 

Í morgin verður marknaeftirlitið víðkað til eisini at fevna um markið til Danmark og Beneluxlondini, sum er politiska heitið fyri Belgia, Holland og Luksemborg.

Forðar ikki yvirgangi

Knaus vísir á, at fleiri lond í ES, - eitt nú Frakland og Eysturríki, hava havt eftirlit á markinum í fleiri ár, uttan at tað hevur minkað um talið av ólógligari tilflyting yvirhøvur. Hann sigur eisini, at marknaeftirlitið heldur ikki kann brúkast til at forða islamskum yvirgangi. Tí fleiri gerningsmenn eru radikaliseraðir í Týsklandi. 

Skal ólógliga tilflytingin steðgast, er neyðugt við víðfevndum tiltøkum, sigur granskarin.

- Er ætlanin at steðga ólógligu tilflytingini púrasta, kann tað bara gerast við at avtaka Schengen. Og neyðugt verður so eisini at seta upp hegn á markinum, sigur Gerald Knaus, granskari, í samrøðu við týsku útvarpsstøðina Deutschlandfunk.