Føroyar varðveita somu kredittmeting

Føroyar varðveita somu kredittmeting hjá Moody´s.

Ratingin eitur Aa2 við støðugum útlitum.

Føroyar hava við hesum triðhægstu meting á ratingstiganum hjá Moody's, sum hevur 21 stig.

Ratingin byggir á grundleggjandi kredittmeting, sum er um afturgjaldsevnini hjá landskassanum.

Og Moody’s metir tað vera sera sannlíkt, at Danmark, sum hevur hægstu kredittmeting, AAA, kemur Føroyum til hjálpar í kreppu.

Ratingin versnar, um sambandið við Danmark viknar. 

Moody´s, rating og Moody´s

Afturgjaldsevnini batnað

Í hesi nýggjastu kredittmetingini frá Moody’s sigur Moody’s, at afturgjaldsevnini hjá landskassanum eru eitt sindur betri enn tey vóru, og tí hækkar grundleggjandi kredittmetingin eitt stig.

Orsøkin er, sigur Moody’s, at landskassin í nógv ár hevur havt nærum javnvág á landsroknskapinum, og at skuldin tí hevur verið nærum óbroytt. 

Harafturat er gjaldføri landskassans sera gott.

Støðug útlit vera givin, tí Moody’s millum annað væntar, at búskaparligi politikkurin framhaldandi vil stuðla undir búskaparligum støðufesti, og at landskassans gjaldføri framhaldandi er gott.

Moody´s sigur, at nógvir íleggjarar vilja læna Føroyum pengar.

ESG-rating

Umframt fíggjarligu ratingina ger Mooody’s eina ESG-rating. 

ESG-ratingin sigur nakað um váðar, sum stava frá umhvørvi, til dømis broytingar í veðurlagi, sosialum umhvørvi, sosialum spenningum, til dømis, hvussu útreiðslutrýstið frá vaksandi tali av eldri fólki verður fíggjað og stjórnarskipan í breiðum týdningi, millum annað um almennir myndugleikar hava trúvirði, og um politiskar avgerðir eru gjøgnumskygdar.

Karakterstigin gongur frá 1, sum er besti karakterur, til 5.

Føroyar fáa 3 fyri umhvørvi, 2 fyri sosialt umhvørvi og 1 fyri stjórnarskipan. 

Miðal er tí 2, sum er næst besta ratingin.