ES letur Ukraina 334 milliardir

ES ætlar at lata Ukraina lána 334 milliardir krónur í innifrystum russiskum ognum.

ES-kommissjónin hevur tikið hesa avgerðina í dag, og hon er gjørd út frá G7-avtaluni.

- Hetta er eitt stórt framstig, segði Ursula von der Leyen, forkvinna í ES-kommissjónini, á tíðindafundi í Kyiv saman við Volodymyr Zelenskyj, forseta.

Fyrimunirnir fyri bæði ES og Ukraina eru eyðsæddir.

Við hesari loysnini fær Ukraina eitt hart tiltrongt ískoyti í landskassan, meðan talan er um pengar, sum onga ávirkan hava á skattgjaldarar í Evropa. Lánið er nevniliga fíggjað av rentum av russiskum virðum, sum ES-lond hava lagt hald á.

Tá tað snýr seg um, hví ES kemur við hesum uppskotinum sigur Ursula von der Leyen millum annað:
- Vit vilja lata Russland gjalda fyri oyðileggingarnar, sum tey sjálvi hava framt.

Sambært Volodymyr Zelenskyj, forseta, skulu pengarnir leggjast í orku-undirstøðukervið í landinum, sum er fyri áhaldandi bumbuálopum, verjuskipanir skulu gerast og sjúkrahús skulu endurbyggjast. 

Síðan skulu pengar leggjast í ukrainsku verjuna, fyrst og fremst í dronuídnaðin, og til meiri luftverju.