Fámjinstunnilin fer nú at kosta 285 milliónir

Játtanarkamurin í verklagslógini um Fámjinstunnilin verður nú hækkaður upp í 285 milliónir kr.

Hann hevur verið 252 milliónir kr. 

Neyðugt er at hækka játtanarkarmin, soleiðis at Landsverk kann gera fíggjarliga bindandi avtalur um tað, sum restar í av verkætlanini, og tilhoyrandi vegir, sigur Dennis Holm, landsstýrismaður, sum hevur lagt uppskotið fyri tingið.

Fámjinstunnil, berghol til Fámjins

Fleiri omanlop

Tilfarið í Fámjinstunlinum er út av lagi vánaligt. Tvey stór omanlop vóru í tunlinum í 2023, og omanlop hevur eisini verið í ár, umframt aðrir trupulleikar. Arbeiðið er nógv tarnað, og tað hevur stóran meirkostnað við sær.

Í hesum árinum eru játtaðar tilsamans 88 milliónir kr., men tá óbrúkt játtan verður flutt fram, er tøka játtanin góðar 97 milliónir í ár.

Á eykajáttanarlógini, sum júst er løgd fram, er biðið um 19 milliónir kr. í ár, og á fíggjarlógini fyri næsta ár eru 14 milliónir kr. settar av at gera verkætlanina lidna. 

Í viðmerkingunum til uppskotið verður upplýst, at Landsverk hevur reist mál móti tryggingarfelag um endurgjald fyri meirkostnaðin.