Færri pengar til eftirlit við rúsevnum

Í fíggjarlógaruppskotinum fyri 2025 verður játtanin hjá Taks, sum hevur marknaeftirlitið um hendi, skerd við 700.000 krónum.

Eyðun Mørkørem, stjóri í Taks heldur, at tað er neyðugt at styrkja marknaeftirlitið.

Í ískoytispartinum til ólavsøkurøðu løgmans í ár undir yvirskriftini "Styrkt eftirlit við innflutningi av rúsevnum" stendur millum annað:

"Sambært heildarætlanini um at fyribyrgja og tálma rúsevnismisnýtslu skulu átøk fremjast komandi árini, sum væntandi fara at bøta um eftirlitið við innflutninginum, so at tað verður torførari at flyta rúsevni inn í landið."

Men tað er júst tað øvugta, ið hendir.