Føroyingar taka undir við gjøldum á tóm hús

bannari
Føroyingar taka undir við gjøldum á tóm hús
Tveir av trimum føroyingum taka undir við, at kommunurnar fara at leggja tænastugjald á summarhús og hús, ið standa tóm
Undirtøkan fyri at leggja tænastugjøld á tóm hús er størst í Suðuroy
Mynd: Tilvildarlig mynd  
 
16.10.2024 - 10:33

Tveir av trimum føroyingum, ella 67 prosent, taka undir við, at føroysku kommunurnar skulu fáa heimild til at leggja tænastugjald á summarhús og hús í kommununi, sum standa tóm.

Tað vísir stóra kommunukanningin hjá Kringvarpinum.

Men 22 prosent siga nei, og 11 prosent siga seg ikki vita.

Løgmálaráðið hevur í umbúna at gera eitt lógaruppskot, sum skal geva kommununum heimild til at taka eitt sonevnt tænastugjald frá húsaeigarum, sum hava summarhús ella hús, sum standa tóm. Kommunufelagið hevur leingi viljað, at kommunurnar fáa eina slíka heimild. Tænastugjaldið skal takast fyri eitt nú kavarudding, avheintan av burturkasti, viðlíkahald av vegum og øðrum kommunalum tænastum, ið verða veittar hesum húsum, sjálvt um tey standa tóm ein stóran part av árinum.

Júst hvussu stórt hetta tænastugjaldið skal vera - ella um nakað gjald skal vera yvirhøvur - verður upp til kommunurnar sjálvar at gera av.

Kanningin vísir eisini, at tað serliga eru mannfólkini, sum taka undir við tænastugjøldunum, men munurin á kynunum er ikki so stórur í hesum føri.

Hinvegin er rættiliga stórur munur á aldursbólkunum. Tí aldursbólkinum 18-29 ár eru væl færri, sum taka undir við tænastugjøldum, enn í eldru aldursbólkunum.

Hyggja vit so eftir økjunum í landinum, er eisini rættiliga stórur munur á. Í Suðuroy siga 80 prosent seg taka undir við tænastugjøldum, men í Norðoyggjum eru tey bert 57 prosent.


Talvurnar vísa undirtøkuna fyri tænastugjøldum, býtt á kyn, aldur og hvussu undirtøkan er ymsastaðni í landinum
 

Kanningin vísir eisini, at undirtøkan fyri tænastugjøldum eisini er tengd at, hvussu stóra inntøku fólk hava. Og tað er helst ikki so óvæntað, at undirtøkan fyri tænastugjøldum veksur í tráð við hvussu stór ársinntøkan hjá fólki er - men undirtøkan minkar aftur hjá teimum, sum forvinna allarmest.


Talvurnar vísa undirtøkuna fyri tænastugjøldum, býtt á ársinntøku hjá ávikavist einstaklingum og húsarhaldum
Er kopiera
Nýggjastu sendingar í ÚV
Fríggjadag 22. august
Breddin: Vitlíki - fyrimunir og vansar
195886
Fríggjadag 22. august
RagnarRokk: Maik Weichert um Heimat
194233
Fríggjadag 22. august
Morgunlestur fríggjadagur 22. august 2025
195629
Nýggjastu sendingar í SV
Fríggjadag 22. august
Barnaróður finalan
195887
Hósdag 21. august
Veðrið
195855
Mikudag 20. august
Dagur og vika - teknmálstulkað
195799
Týsdag 19. august
Veðrið
195771
Týsdag 19. august
Dagur og vika við 3-2 - teknmálstulkað
195740