Dýrt at koyra uttan koyrikort

Í tveimum førum í nátt vórðu bilførarar steðgaðir, sum ikki høvdu eitt koyrikort at vísa fram. Tann fyrri varð steðgaður í Vágum beint fyri midnátt, og tann seinni um trý tíðina í nátt í Havn.

Bilførararnir fáa 5.000 krónur í bót í part.

Bótin fyri at koyra uttan at hava nakað koyrikort at vísa fram, veksur annars við tíðini. Fyrstu ferð kostar tað 5.000 krónur, aðru ferð 6.000 krónur, triðju ferð 7.500 krónur, fjórðu ferð 10.000 krónur, og fimtu ferð er bikarið fult - tá førir tað til fongsulsrevsing.

Hetta eru bøturnar til tey, sum koyra uttan at hava koyrikort. Um tú hevur mist koyrikortið og framvegis koyrir bil - tað vil siga koyrir í frádømingartíðini - kostar tað eina netto mánaðarløn í bót fyrstu ferð. Og gert tú tað aðru ferð, fært tú 10 dagar í fongsul.

Um 10 tíðina í gjárkvøldið varð ein annar bilførari steðgaður í Havn og er nú skuldsettur fyri rúsevnakoyring. 

Út á náttina og morgunin vórðu tveir aðrir bilførarar eisini tiknir í høvuðsstaðarøkinum fyri rúsdrekkakoyring.

Nógv fólk var í býnum í Havn í nátt, men sum heild gekk tað friðarliga fyri seg, sigur løgreglan.

Politiið gjørdi eisini vertshúseftirlit í Havn og í Klaksvík, men har var onki at koma eftir.