Nógv minni reint alkohol verður selt nú

Vøksturin í søluni hjá Rúsdrekkasøluni er nógv minni enn vøksturin í fólkatalinum.

Hann var 2,38 prosent størri í 2023 enn í 2013. Og tá er talan um reint alkohol í spiritusi.

Hesi árini vaks fólkatalið 13,28 prosent.

Hetta sæst í ársfrágreiðingini hjá Rúsdrekkasølu landsins fyri 2023.

Føroyingar keypa nú meira veikan løg, vín og øl, meðan spiritussølan er minkað.

Nýtslan í 1992, tá Rúsdrekkasølan kom, var 8,8 litrar av reinum alkoholi fyri hvørt fólk 15 ár ella eldri, men í 2023 var hon 6,2 litrar.

Rúsdrekkasølan seldi 4.148 sløg í 2023, nakað minni enn í 2022, tá sløgini vóru 4.319.

Rúsdrekkasølan hevur átta handlar og goymslu á Hjalla, og hon hevði í 2023 34 fólk í føstum starvi og 30 tímalønt fólk.