Tupperware í Norðurlondum eisini farið á húsagang

Norðurlendska deildin hjá altjóða fyritøkuni Tupperware, sum eitur Tupperware Nordic, er farin á húsagang, og er tí tikin til trotabúsviðgerð av Sjó- og handilsrættinum í Keypmannahavn.

Amerikanska móðurfelagið fór í gjaldssteðg seinasta heyst, men seinast í oktober komu boð um, at felagið varð selt og tí bjargað.

Nú er tað so norðurlendska dótturfelagið hjá Tupperware, sum hevur fingið so stórar trupulleikar, at felagið verður koyrt á húsagang.

Tupperware byrjaði í 1946 við sølu heima hjá fólki, og í 1962 kom felagið til Danmarkar, sum fekk ábyrgdina av øllum Norðurlondum. 

Tupperware hevur eisini verið í Føroyum í nógv ár, men tað heldur eisini uppat, nú norðurlendska deildin hjá felagnum letur aftur.