Dart, kappróður og flogbóltur kappast um besta felagsskapin

Dartsamband Føroya, Ternan og Hósvíkar Róðrarfelag eru í uppskoti til viðurslønina Ítróttafelagsskapurin 2024, sum verður latin á Ítróttafagnaðinum hjá Ítróttasambandi Føroya.

Dartsamband Føroya

Dartsambandið varð endurstovnað í 2012, og nú eru 10 feløg við sløkum 200 virknum spælarum kring landið. Dart er góðkend ítrottagrein undir ÍSF, og Føroyar eru limur í World Darts Federation. Sterkar altjóða kappingar eru í Føroyum hvørt ár, føroyska landsliðið kappast til altjóða kappingar og í 2026 skipar sambandið fyri evropameistaraheitunum í Føroyum, tá umleið 500 fólk væntast at koma hendavegin, skrivar ÍSF millum annað.

Flogbóltsfelagið Ternan

Ternan á Toftum er lutfalsliga ungt felag, men framgongdin síðan stovnanina fyri knøppum 15 árum síðan, hevur verið stór. Felagið, sum leggur stóran dent á breidd og trivna, hevur nú 180 limir og lið í flestu flogbóltsdeildunum. Felagið leggur stóran dent á at styrkja ungdómsarbeiðið við góðum venjarum og umstøðum, og seinasta kappingarár vinnu fleiri av ungdómsliðunum heiðursmerki. Eisini hevur verið boð eftir leikarum í landsliðshøpi, stendur millum annað í grundgevingini hjá ÍSF.

Hósvíkar Róðrarfelag

HVR hevur eina samansjóðandi ávirkan á alt Sundalagið, tí rógvarar úr nógvum ymsum bygdum manna bátarnar í Hósvík, og HVR møtir fjølment til allar kappingar. Seinastu árini hevur lutfalsliga lítla felagið havt fleiri manningar til FM-róðurin - í 2024 heili sjey í tali - og á hvørjum ári er felagið við í FM-stríðnum. Harumframt hevur Hósvíkar Róðrarfelag verið væl mannað til kappingar í inniróðri, og rógvarar hava vunnið bæði føroya-, danmarks-, evropa- og heimsmeistaraheiti, skrivar Ítróttasambandi Føroya millum annað í grundgevingini.

Ítróttafagnaðurin 2024 verður í Løkshøll leygarkvøldið 1. februar og verður vístur beinleiðis í sjónvarpinum hjá Kringvarpinum.