FSF-forsetin: Nýggjur landsliðsvenjari verður settur í næstum

Um slakan hálvan annan mánað skal A-landsliðið hjá monnum aftur í eldin. Tann 22. mars skal føroyska landsliðið á útivølli spæla undankappingardyst ímóti Kekkia og tríggjar dagar seinni er Montenegro vertur. Tí hevur tað týdning, ikki minst fyri landsliðið sjálvt at fáa ein nýggjan venjara upp á pláss, so hann kann vera við frá byrjan í nýggju HM-undankappingini.

Og stendur tað til Christian Andreasen, forseta í Fótbóltssambandi Føroya, so ganga í mesta lagi tvær vikur áðrenn tað verður almannakunngjørt, hvør verður nýggjur landsliðsvenjari.

FSF hevur arbeitt saman við danskari ráðgevingarfyritøku, sum eisini hevur arbeitt saman við fleiri av hinum norðurlendsku sambondunum, fyri at finna fram til rætta profilin, og tá tað var komið upp á pláss varð farið at leita eftir møguligum kandidatum.

- Tað vóru 15 evnir á listanum at byrja við og so hava vit sáldað frá, so vit nú eru komin niður á tríggjar kandidatar, sigur Christian Andreasen, forseti í FSF.

Ein av kandidatunum er føroyingur, men um tað verður ein føroysk loysn ella enn ein útlendsk, er støða ikki tikin til enn.

Spurdur nær nýggi landsliðsvenjarin verður settur, sigur Christian Andreasen, at tað helst ikki skulu ganga meira enn tvær vikur áðrenn tað er avgreitt.

- Vit fáa eitt tilmæli frá leiðsluni í Fótbóltssambandinum, bæði tí fyrisitingarligu og tí ítróttarligu, í næstum og so fara vit víðari harfrá. Og vónandi kunnu vit fáa tað avgreitt í næstu viku, ella í seinasta lagi í aðru viku, sigur Christian Andreasen, forseti í FSF.

Hoyr alt innslagið, sum var í tíðindunum klokkan 14.00.