Tunnilsfelagið uppskot um nýggja vegaloysn á Sandi

Tunnilsfelagið, sum fyrireikar Suðuroyartunnilin, ætlar nú at sleppa uttan um Sands bygd við einum nýggjum vegi uppi á Hamrinum eystan fyri bygdina. 

Kristian Oskar Henriksen, borgarstjóri, sigur, at tað er ein møguleiki at leggja vegin uppi á Hamrinum.

Áðrenn verkætlanin hjá tunnilsfelagnum var løgd fram í november, hevði felagið ikki tosað við Sands og Hvalbiar kommunur, um hvussu ein tunnil fór at ávirka ferðsluna gjøgnum bygdirnar. 

Men nú í januar hevur tunnilsfelagið tosað við kommunurnar.

Borgarstjórin á Sandi hevur verið á fundi við tunnilsfelagið, og felagið hevur lagt fram eitt uppskot, so tað slepst undan allari tungu ferðsluni í bygdini.

Kristian Oskar Henriksen

Kristian Oskar Henriksen, borgarstjóri. 

Snara til Skopunar

Uppskotið er at gera ein veg eftir Hamrinum, soleiðis at tá ið komið verður upp úr Sandoyartunlinum, verður snarað til Skopunar og koyrt eitt sindur niðan brekkuna. Ein nýggjur vegur skal gerast eystur í Hamaran, og so skal ein vegur vera eftir Hamrinum allan vegin, til tú kemur í vegin til eystanbygdirnar. 

Borgarstjórin kunnaði bygdaráðið á Sandi um ætlanirnar í gjárkvøldið.

Men tað eru ikki øll í bygdarráðnum, ið taka undir við ætlanini.

Poul Klementsen

Poul Klementsen, bygdarráðslimur. (Mynd: Bjarni Árting Rubeksen)

Vindhart

Poul Klementsen, bóndi og bygdarráðslimur tekur als ikki undir við ætlanini. Hann væntar, at tað kann verða vindhart at koyra uppi á Hamrinum.

Poul Klementsen vil heldur, at ætlanin, sum Jón Sigurdsson og Kristian Stórhamar løgdu fram í desember, har ein tunnil fer undir Sands bygd, upp í Skúgvoy, og síðani víðari til Suðuroyar, verður til veruleika.

Jón Sigurdsson og Kristian Stórhamar arbeiða nú við einum nýggjum uppskot, har tunnilin verður umleið 800 metrar longri, og fer niður innan fyri Múlan. Poul Klementsen væntar, at tað fer at kosta umleið 300 milliónir krónur aftrat.

Hoyr innslag í útvarpstíðindunum: