MobilePay í Føroyum í vár

Nú kanst tú skjótt brúka MobilePay í Føroyum.

Føroysku peningastovnarnir hava í fleiri ár samskift við MobilePay, um at fáa tænastuna tøka í Føroyum. Nú er arbeiðið komið so mikið væl áleiðis, at privatkundar væntandi kunnu byrja at brúka MobilePay í apríl.

MobilePay er ein app á fartelefonini, sum kann flyta pengar millum brúkarar, uttan at rita inn á netbankan.

Tað ger tað skjótt at rinda í handlum og nethandlum, og at flyta øðrum pengar.

Vinnurekandi og felagsskapir fáa eisini gagn av MobilePay, eftir ætlan kunnu hesi byrja at taka ímóti gjaldingum fyri summarfrítíðina.

Tá verður munandi lættari at taka ímóti gjaldinum til ítróttartiltøk, festivalar, í handlum, á kaffistovum og á matstovum, skriva føroysku peningastovnarnir í tíðinaskrivi.

Av tøkniligum ávum hevur tað higartil ikki borið til at brúkt føroysk p-tøl, v-tøl, telefonnummur og Samleikan í MobilePay, og tí hevur appin ikki riggað í Føroyum.