Turið tekur eitt tørn afturat

Turið Arge Samuelsen, sum gavst á føroyska hondbóltslandsliðnum eftir søguliga EM-endaspælið í desember, tekur enn eitt tørn.

Tað sama ger verjugeneralurin Brynja Høj. Tær vera báðar við, tá Føroyar spæla playoff-dystir til HM ímóti Litava í apríl.

 - Landsliðsvenjarin setti seg í samband við meg fyri einum mánað síðan og spurdi, um eg ikki kundi taka hesar báðar dystirnar Hann helt tað var upplagt, eftirsum kappingarárið framvegis er í gongd, og at tað hevði verið gott, at havt meg og Brynju við, segði Turið Arge Samuelsen.

 - Tað er trupult at siga nei, tá hann spyr, um eg vil hjálpa kvinnulandsliðnum til koma til HM, so eg segði gamaní, sigur skjóti vongurin, sum kortini slær fast, at talan bert verður um dystirnar ímóti Litava. Eisini um úrslitið verður eitt HM-pláss.

Fínpussa spælið

Føroyska landsliðið skal venja saman alla vikuna, og tíðin skal brúkast til at nýggja spælið upp aftur og at bøta um tað, sum kann bøtast um.

 - Vit halda millum annað, at vit skulu fáa meir burturúr okkara kontraspæli, og so vilja vit menna álopsspælið eitt sindur eisini, segði hjálparvenjarin, Simon Olsen, sum stóð á odda fyri fyrstu venjingini sunnukvøldið.