Gongur skeivan veg við kvinnurættindum

Í dag er 8. mars, sum er altjóða kvinnudagur.

Ein frágreiðing hjá ST vísir, at í 2024 vóru kvinnurættindi fyri afturstigi í nærum fjórða hvørjum landi.

Og hóast 87 lond nú hava ella hava havt eina kvinnu sum ovasta leiðara, so er enn langt eftir á mál til veruliga javnstøðu.

"Tá ið kvinnur og gentur kunnu reisa seg, trívast vit øll," sigur ST-aðalskrivarin António Guterres millum annað í sínum boðskapi til í dag.

"Men í staðin fyri at gera javnstøðu til eitt høvuðsrák, síggja vit, at høvuðsrákið er kvinnuhatur," sigur hann.

"Saman mugu vit standa sterk í at gera mannarættindi, javnstøðu og kvinnumátt til ein veruleika hjá øllum kvinnum og gentum, fyri allar, allastaðni," sigur ST-aðalskrivarin.

Framgongd er kortini eisini at síggja á ymsum økjum, tá tað ræður um javnstøðu og kvinnurættindi. ST skrivar, at síðan 1995 hava lond kring heimin gjørt 1.531 lógarbroytingar, sum hava verið fremjandi fyri javnstøðu. 

Talið av kvinnum, sum eru deyðar í barsilssong, er minkað við einum triðingi, og kvinnulig umboðan í tjóðartingum er meir enn tvífaldað seinastu 30 árini, skrivar ST.