Demokraatit vann valið í Grønlandi

Flokkurin Demokraatit fekk 30 prosent av atkvøðunum á valinum í Grønlandi. Framgongdin er heili 21 prosent í mun til valið til Inatsisartut fyri fýra árum síðani.

Jens Frederik Nielsen, floksformaður, gjørdi eisini persónliga eitt sera gott val. Hann fekk fleiri enn 4600 persónligar atkvøður.

Naleraq gjørdi eisini eitt framúr gott val og fekk 24 prosent av atkvøðunum. Tað eru 12 prosent meira enn seinast. Flestu atkvøður hjá Naleraq fekk Aki-Matilda Høegh-Dam, sum fekk umleið 2800 atkvøður. Hon er júst komin úr Siumut yvir í Naleraq. Floksformaðurin, Pele Broberg, fekk umleið 1175 atkvøður.

Tilsamans kunnu Demokraatit og Naleraq skipa stjórn einsamællir, finna teir stevið til tað.

Í formansumfarinum í grønlendska kringvarpinum í nátt segði Jens Frederik Nielsen vera opnan fyri øllum samgongumøguleikum. Hann vildi ikki siga, um Naleraq er fyrsta boð uppá ein samgongufelaga.

Siumut stóri taparin

Sitandi samgonga fekk ein lúsing frá grønlendsku veljarunum. IA flokkurin hjá Múte B. Egede fekk 21,6 prosent av atkvøðunum, heili 15 prosent minni enn á seinasta vali til Inatsisartut. 

Størsti taparin var tó Siumut, sum fór niður í helvt. Flokkurin fekk einans 15 prosent av atkvøðunum, og tað eru nærum 15 prosent minni enn seinast.

Í formansumfarinum, sum varð sent beinleiðis á KNR í nátt, segði floksformaðurin Erik Jensen seg taka fulla ábyrgd av søguliga, vánaliga úrslitinum. Hann fer nú at tosa við floksleiðsluna um úrslitið og framtið floksins, og nógv bendir á, at hann fer at leggja frá sær. Erik Jensen fekk einans góðar 600 persónligar atkvøður.

Atassut stendur í stað við umleið sjey prosentum av atkvøðunum, meðan nýggi flokkurin, Qulluq, bara fekk eitt prosent av atkvøðunum.

Enn mangla nakrar fáar atkvøður at vera taldar. Tær broyta ikki valúrslitið, men fyrr enn tær eru taldar við, verður valúrslitið ikki endaliga staðfest. Og tí eru tingsessirnir heldur ikki býttir út á flokkarnir enn.