Eldsbruni og streymslit í Heathrow

Ein av størstu floghavnum í Evropa, Heathrow í London, er stongd, fyribils til á midnátt, eftir eldsbruna og streymslit í nátt.

Eldurin kyknaði í eini transformarastøð, sum endaði við at standa í ljósum loga, samstundis sum tað elvdi til umfatandi streymslit í floghavnini.

Sambært Reuters vóru í minsta lagi 120 flogfør á veg til Heathrow, tá eldurin kyknaði, og hesi máttu øll beinast til aðrar floghavnir.

Heathrow

Og tað fer eisini at hava stóra ávirkan á flogferðsluna, at Heathrow verður stongd restina av degnum.

Tvær aðrar floghavnir eru í London - Stanstead og Gatwick - men tær eru væl minni enn Heathrow, og kunnu ikki taka ímóti øllum flogførunum, sum nú mugu finna sær aðra floghavn.

Sambært FlightRadar24 verða í minsta lagi 1.351 flogferðir ávirkaðar av hesum restina av degnum og kvøldinum. Og roknast kann við, at flogferðslan fer at verða ávirkað næstu dagarnar eisini.