Frítekst tagging:
- Tíðindi, mentan og ítróttur
HM-lutakast: Góðar møguleikar ímóti Paraguai
HM-lutakast: Góðar møguleikar ímóti Paraguai
Føroysku hondbóltskvinnurnar komu í bólk saman við Montenegro, Spania og Paraguai í HM-endaspælinum. Møguleikarnir ímóti Paraguai eru góðir, meta spælarar
Bjarta O. Johansen verður væl ansað í EM-dystinum ímóti Danmark.
Mynd: Liselotte Sabroe/Ritzau Scanpix
22.05.2025 - 17:00
Føroyar skulu spæla ímóti Montenegro, Spania og Paraguai til HM-endaspælið í Týsklandi og Hollandi í vetur.
Tað var greitt longu áðrenn lutakastið, at Montenegro var í bólki saman við Føroyum, og síðan komu Paraguai og Spania úr ávíkavist styrkisbólki 4 og 2 til lutakastið.
- Montenegro og Paraguai var fínt, men at trekkja Spania var ikki eitt ynski, sigur Bjarta O. Johansen, landsliðsspælari.
- Eg eri væl nøgd við lutakastið, sigur Jana Mittún.
- Úr ovasta styrkisbólkinum fáa vit Montenegro, sum vit eisini fingu til EM-undankappingina. Teimum koma vit tískil at spæla móti einaferð, áðrenn vit møta teimum til HM. Montenegro er ein sterk hondbóltstjóð søguliga. Tær spæla øgiliga nógv við hjartanum og villskapi, sigur bakspælarin, sum ikki veit so nógv til Spania, sum endaði á 13. plássi til EM-endaspælið seinast.
Jana Mittún strýkur ígjøgnum verjuna hjá Litava í HM playoff-dystinum við Tjarnir í apríl. Stórsigurin tryggjaði í roynd og veru Føroyum HM-plássið. (Mynd: Bjarni Árting Rubeksen)
Hoyr samrøðu, sum Jógvan Skeel Nolsøe, hevði við Bjartu Johansen, í útvarpstíðindunum
1745090
Góðir møguleikar ímóti Paraguai
Trý lið komu víðari úr hvørjum bólki, og tí kann verða nóg mikið at vinna á t.d. Paraguai fyri at spæla seg í miðumfarið, sum verður í Dortmund.
- Eg veit einki serligt um Paraguai, men eg kundi ímyndað mær, at vit hava góðar møguleikar har. Tær hava bara verið við tvær, tríggjar ferðir áður, so tað er nokk ikki eitt so sterkt lið, metir Bjarta O. Johansen.
- Úr niðasta styrkisbólki var tað serliga eitt lið, vit ikki vildu hava, og tað var Kroatia. Teimum sluppu vit eisini undan. Fáa so Paraguai. Eg kenni als einki til tær. Tað verður tó spennandi at spæla móti eini hondbóltstjóð, sum eg vænti spælir eitt sindur øðrvísi enn nógvar av teimum evropeisku gera, sigur Jana Mittún.
Málið eftir lutakastið er at spæla seg í miðumfarið, heldur Bjarta O. Johansen.
- Ja, heilt sikkurt. Eg síggi ein møguleika. Paraguai varð nummar 29 seinasta HM-endaspæl, so eg meti, at vit eiga at hava møguleikar móti teimum. Ein sigur er jú nokk til at koma víðari, sigur hon.
Dystirnir hjá Føroyum í bólkaspælinum vera í býnum Trier, sum liggur vestarlaga í Týsklandi nær við markið til Luksemborg.
Dystarskrá:
Mikudagin 26. november: Montenegro – Føroyar
Fríggjadagin 28. november: Spania – Føroyar
Sunnudagin 30. november: Føroyar – Paraguei
Er kopiera
Nýggjastu sendingar í ÚV
Nýggjastu sendingar í SV
