Hákun týskur meistari við Füchse Berlin

Hákun West av Teigum hevur vunnið týska meistaraheitið og skrivað bæði týska og føroyska hondbóltssøgu.

Við sigri á Rhein Neckar Löwen tryggjaði Füchse Berlin sær fyrsta plássið í Bundesliguni og sítt fyrsta meistaraheitið yvirhøvur.

Tað var við tógvi stríð kortini. Rhein Neckar Löwen var frammanfyri frá byrjan, og leingi sá út til, at Magdeburg kundi fara avstað við heitinum í evstu løtu. Ikki fyrrenn eitt gott korter var eftir at spæla, fór høvuðsstaðarfelagið framum, og síðstu løtuna var heldur eingin ivi.

Føroyski vongurin misnýtti báðar sínar kjansir, men tað eigur ikki at nerva hann stórvegis nú. Hákun West av Teigum hevur spælt væl í ár, og eigur sín stóra part av fyrsta meistaraheitinum hjá revunum úr Berlin.

Kappingarárið er ikki liðugt heldur. Um eina viku hava Hákun West av Teigum og liðfelagarnir kjansin at tryggja sær greipuna, tá Champions League Final4 er á skránni. Füchse Berlin skal spæla ímóti Nantes í hálvfinaluni.