Trump lovar Ukraina fleiri vápn

USA er til reiðar at senda fleiri vápn til Ukraina. Hesum boðaði amerikanski forsetin, Donald Trump frá í nátt okkara tíð, tá hann var til døgurða við ísraelska forsætisráðharranum, Benjamin Netanyahu.

Tað er annars ikki meira enn ein vika síðani, at USA boðaði frá, at tey fóru at avmarka talið av vápnum, sum tey lata ukraina, tí USA sjálvt hevði brúk fyri vápnunum.

Men Donald Trump heldur nú, at neyðugt er við fleiri vápnum til Ukraina.

- Vit fara at senda fleiri vápn. Tað eru vit noydd til. Tey skulu kunna verja seg. Tey verða rakt ógvuliga hart í løtuni, segði Donald Trump í nátt.