Vilja hava fólk at fara úr býi, har gíslar møguliga eru

Ísraelski herurin bað í gjár allar íbúgvar í býnum Deir al-Balah um at fara úr býnum og leita sær suðureftir til býin Khan Younis, tí ætlanin var at leypa á. Og nú hevur herurin framt ógvuslig rakettálop á býin.

Deir al-Balah hevur annars ikki merkt nakað til bardagarnar í Gasa, síðan Ísrael leyp á fyri 21 mánaðum síðan. Tí hava nógv flóttafólk leitað sær til býin, sum nú eisini verður bumbaður.

Tað ljóðar, at fleiri av ísraelsku gíslunum eru í Deir al-Balah, og at tað er orsøkin til, at býurin hevur fingið frið. Hildið verður, at 20 av teimum 50 gíslunum, sum enn eru á lívi í Gasa, helst eru í býnum.

Avvarðandi hjá gíslunum hava eisini í dag gjørt vart við seg, og biðið herin um at fara varliga fram. Men ógvusligu loftálopini benda ikki júst á, at tað verður farið varliga fram.

Av tí at Deir al-Balah hevur fingið frið, er hann ein av fáu støðunum í Gasa, har tað hava verið virkandi sjúkrahús, reint vatn og ruskkoyring.

Samstundis sum Deir al-Balah verður bumbaður, eru fleiri onnur álop eisini sett í verk, millm annað á Gasa bý.