Fór beinleiðs av Oyggjaleikunum til Grand Prix-finalu í Niðurlondum

Bogaskjúttin Jóannes Poulsen fór beinleiðis av Oyggjaleikunum í Orkney til Arnhem í Niðurlondum at taka lut í stórari Grand Prix-Compound-kapping, har mótstøðan er væl sterkari enn á Oyggjaleikunum. 

Og væl hevur gingist, tí hann hevur skotið sínar pílar so mikið væl, at hann er komin í finaluna, har hann skal møta slovakiska Jozef Bosansky, sum er professionellur skjútti.

Við góðari hjálp frá norska landsliðnum kann lambamaðurin nú hugsavna seg til finaluna leygardagin, har hann hevur fokus á sítt egna avrik - og ikki mótstandaran.

Jóannes Poulsen hevur áður verið í dysti við slovakiska skjúttan, og hóast Jóannes er styrkimettur nógv lægri enn slovakkin, so hevur hann góðar vónir til finaluna.

Hoyr innslag úr tíðindunum á nátturða:

Eftir skránni verða fyrstu pílarnir skotnir eitt sindur yvir klokkan 11 fyrrapartin leygardagin føroyska tíð.