Sirkill og Ranja FM-favorittar í tvíspor

Sirkill úr Nólsoy og 17 ára gamla reiðkvinnan Ranja H. Djurhuus hava lagt seg fremst í kappingin um føroyameistaraheitið í tvíspori fyri vaksin eftir heystkappingina í Havn leygardagin.

Bert níggju hundraðpartar vóru á muni millum Sirkill við Ranju H. Djurhuus ( 29,39 sekund), og Hall Hansen á Grana (29,48), sum endaðu á 2. plássi á teimum 400 metrunum í Havnardali. Svanna við Barbaru R. Mouritzen á baki fingu bronsuna á degnum.

Vinnararnir leygardagin hava nú 21 stig tilsamans í kappingini um FM-heitið í tvíspor, meðan Svanna hevur 17 stig á 2. plássið. Frani og Silfá hava 16 stig í part.

Seinasta kappingin verður í Vágum um tvær vikur.

 - Síðani Nólsoyingur var í vælmaktini munna tað ikki vera komin nógv FM-heiti til Nólsoyar, so væntandi verður okkurt gjørt burturúr, um Sirkill vinnur FM um tvær vikur, skrivar Ríðisamband Føroya.