EB og VB hyggja uppeftir

EB tók ímóti VB í Felagsskúlanum á Oyrabakka, tá besta hondbóltskappingin hjá kvinnum byrjaði um vikuskiftið.

Bæði liðini hava stríðst í botninum síðstu árini, men hava ætlanir um at røkka endaspælinum - pláss millum seks tey ovastu - hetta kappingarárið.

At hjálpa sær við tí, hevur EB fingið styrk frá tveimum royndum spælarum úr Kyndli. Jovana Stranjanak skal verja málið í Sundalagnum, meðan Nadja Pejovic skal standa fremst í bæði álops- og verjuspælinum hjá teimum hvítu og svørtu.

VB hevur eisini styrkt seg nakað, og sum venjarin Gurið Augustinussen sigur; allar eru eitt ár eldri og royndari. Tað skal serliga koma til sjóndar á heimavølli, har vágbingar ikki hava fingið nóg nógv burturúr, sambært Gurið Augustinussen, sum stendur á odda fyri liðnum saman við systrini Báru Mortensen.