Liðskiparin: - Vit trýsta tær hart fyri steðgin

Lagið var frálíkt við Tjarnir, tá Føroyar og Montenegro fóru til hálvleiks. Støðan var javnleikur 14-14, og føroyingarnir fylgdu við krútsterka útiliðnum.

Eftir steðgin kom kortini stígur í. Tær svørtu lyftu sítt spæl í álopinum, og í verjuni sást nú greitt, hví júst verjan hjá Montenegro sigst vera millum tær bestu í Evropa.

Tí máttu Pernille Brandenborg og hinar hjá Føroyum taka til takkar við 32-26 tapi. 

 - Tað er eingin skomm at tapa fyri Montenegro. Tær eru góðar, men eg haldi kortini, at vit høvdu møguleikan. Vit trýsta tær væl í fyrra hálvleiki, men so fer luftin úr ballónini, segði føroyski liðskiparin, sum spældi sín 50. dyst fyri Føroyar.

 - Tær skrúva upp fyri kroppsliga partinum av verjuspælinum, og vit hava ilt við at skora. Vit fáa ikki flutt tær nóg nógv í 2. hálvleiki, og so eru tær tungar at dansa við, segði Pernille Brandenborg.