Jana á vikuliðið hjá EHF

Jana Mittún taldist enn einaferð millum avgerandi spælararnar hjá føroysku hondbóltskvinnunum, sum løgdu fyri í EM-undankappingini við útisigri á Íslandi og tapi fyri krútsterka Montenegro við Tjarnir.

Sum ikki einaferð stjórnaði Viborg-bakspælarin føroyska álopsspælinum við yvirhøvur við hepnari hond, hóast tað eisini varð til nakrar villur - kanska serliga í seinna hálvleiki ímóti Montenegro. Tí hevur evropeiska hondbóltssamgongan EHF valt hana til spælskipara á vikuliðnum hesa ferð.

Jana Mittún var ógvuliga eyðsæð á føroyska landsliðnum, sum vann á Íslandi og tapti fyri Montenegro í fyrstu EM-undankappingardystunum. Her eru nøkur av málum hennara.

Jana Mittún skeyt samanlagt 13 mál, og serliga riggaði samspælið við Súnu Krossteig Hansen væl. Menningin hjá kvika og treiska hondbóltssnillinginum úr Hoyvík hevur verið eyðsæð, síðan hon fór til Viborg í bestu donsku deildini fyri góðum tveimum árum síðan. 

Hon brúkti fyrsta árið at fella til í nýggja umhvørvinum og vinna sær fast pláss á liðnum, men nú spælir hon nú lyklaleiklut hjá danska felagnum.

jana_mittun_totw.jpg

Frítekst tagging: 

Ítróttur

Hondbóltur

EHF

Jana Mittún