- Tíðindi, mentan og ítróttur
Stór lagalig lán aftur í løgtingið
Aksel V. Johannesen, løgmaður, eigur uppskotið um, at Íleggingargrunnurin skal lata Suðuroyartunlinum 350 mió. kr. í láni og Vága floghavn 350 mió. kr. er komið aftur í løgtingið.
Tað var í løgtinginum í vár, men bleiv ikki avgreitt og datt tí burtur, tá tingsetan endaði á ólavsøku.
Uppskotið var einmælt samtykt eftir aðru viðgerð.
Men, tá triðja viðgerð var, fór uppskotið aftur í fíggjarnevndina, har tað var liggjandi og síðani datt burtur, tá tingsetan endaði.
Lánið avtalast við nevndina
Hjá Suðuroyartunlinum skal lánið vera rentu- og avdráttarfríar í 30 ár og hjá Vága floghavn skal lánið vera rentu- og avdráttarfrítt í tíggju ár.
Sambært lógaruppskotinum skulu treytirnar avtalast við nevndina í grunninum.
Millum annað møguleikin fyri fleiri og styttri lánum enn ávikavist 10 og 30 ár.
Íleggingargrunnurin er ein grunnur frá 1964.
Endamálið við Íleggingargrunninum er at veita fígging til íløgur, serliga í sambandi við undirstøðukervið. Í gjøgnum árini hevur grunnurin millum annað fíggjað útbyggingar hjá SEV, brúnna um Streymin og ymsar tunnilsverkætlanir umframt nýggj flogfør hjá Atlantic Airways.
ĺleggingargrunnurin varð stovnsettur eftir samráðingar millum føroyskar og danskar myndugleikar í 1964 sambært fólkatingslóg.
Upprunaliga fæið í grunninum var 60 milliónir krónur. Ognirnar eru í dag smáar 700 milliónir krónur.
Landsstýrið hevur gjøgnum árini umsitið Íleggingargrunnin og valt nevndina fyri grunnin.
Men 1. januar 2025 kom Íleggingargrunnurin formliga á føroyskar hendur.
