USA herðir tiltøkini móti Russlandi

Amerikanska stjórnin hevur gjørt av at seta strangari tiltøk í verk ímóti tveimum av teimum størstu oljufeløgunum í Russlandi, Rosneft og Lukoil, og fleiri dótturfeløgum hjá hesum báðum.

Tað verður gjørt, tí Vladimir Putin, forseti Russlands, ikki vil gera ein enda á meiningsleysa krígnum í Ukraina, sigur amerikanski fíggjarmálaráðharrin, Scott Bessent, í einum tíðindaskrivi frá fíggjarmálaráðnum.

Málið við herdu tiltøkunum er at minka møguleikan hjá Kreml at fáa inntøkur, sum kunnu brúkast til at fíggja kríggið í Ukraina.

Tíðin komin at steðga drápunum

- Tíðin er komin at steðga drápunum og at fáa vápnahvíld alt fyri eitt, sigur Scott Bessent, sum leggur aftrat, at tá forseti Russlands ikki vil gera ein enda á krígnum, so er neyðugt at herða tiltøkini.

Avleiðingin av herdu tiltøkunum er, at allar ognir og øll áhugamál í ognum, sum tey bæði feløgini eiga, ella aðrir bannaðir persónar eiga, nú vera bannað, og boðast skal frá tí til amerikanskar myndugleikar.

Tað merkir í stuttum, at eingin amerikanari, hvørki persónar ella fyritøkur, hevur loyvi til at samstarva við hesar fyritøkur. Verða hesar reglur brotnar, kann tað hava við sær, at tey, sum bróta reglurnar, verða stevnd.

Oljuprísurin hækkaði umleið trý prosent í morgun, eftir at herdu revsitiltøkini ímóti russisku oljufeløgunum vórðu sett í verkk, skrivar tíðindastovan Reuters.