Julian eigur nú metið á hálvum maraton

Frálíka árið hjá rennaranum Juliani Gregersen heldur fram.

Klaksvíkingurin tók føroyska metið í hálvum maraton, tá hann rann teinin upp á 1.07:57 í Valencia fyrrapartin sunnudagin.

Marnar Djurhuus átti gamla metið. Í 2014 kom hann á mál í Keypmannahavn við tíðini 1.08:52, so nýggja metið hjá er nærum ein minutt skjótari.  

 - Tað var stuttligt at taka føroyska metið í hálvmarathon, skrivar Marnar Djurhuus á Facebook.

 - Men met skulu takast. Eg haldi, at tað er fantastiskt at Julian í morgun hevur tikið metið. Ótrúliga flott og kempi til lukku.

Í summar tók Julian Gregersen eisini gamla metið hjá Albert Marna Joensen á fimm kilometrum á landavegi, tá tað eisini eydnaðist at renna undir 15 minuttum.

Harafturat vann klaksvíkingurin gull í hálvum maraton í liðkappingini á oyggjaleikunum saman við Rógva Kárason og Nela Heldarskarð, sum eisini runnu í Valencia í dag.

Teir settu báðir persónligt met. Rógvi Kárason rann teinin upp á 1.09.51, og Neli Heldarskarð kom á mál við tíðini 1.11.43.