Annika má víkja fyri Gyltu

Eitt sindur óvæntað er Annika F. Petersen ikki á dómaraseðlinum í kvøld. Gylta á Neystabø loysir av í málinum, meðan Maria H. Weyhe tekur plássið hjá Mariannu G. Eystberg

Gylta á Neystabø er við á dómaraseðlinum fyri Anniku Fríðheim Petersen til dystin ímóti Spania í kvølddystin

Mynd: Jure Erzen/kolektiff

Símun Christian Olsen

28.11.2025 - 14:12

Annika Fríðheim Petersen stóð fyri kanska besta føroyska avrikinum í tapinum fyri Montenegro í fyrsta umfari av HM-kappingini mikukvøldið.

Tað helt í øllum førum Ingi Olsen, sum gav royndasta føroyska málverjanum fýra av fimm stjørnum, eftir at hon hevði bjargað 42 prosent av skotunum, sum komu, meðan hon stóð í føroyska málinum.

LES EISINI: Undirhondin: Ingi Olsen metir um spælaraavrikini móti Montenegro

Tí er tað kanska eitt sindur óvæntað, at hon má víkja á dómaraseðlinum fyri blaðungu Gyltu á Neystabø, sum er við til endaspæl fyri fyrstu ferð.

251128_Annika_net

Annika Fríðheim Petersen kom inn miðskeiðis í fyrra hálvleiki ímóti Montenegro, og við fleiri góðum bjargingum helt hon Føroyum inni í dystinum

Maria Halsdóttir Weyhe sat uttanfyri seinast, men hon tekur í kvøld plássið hjá Mariannu G. Eystberg ímillum føroysku bakspælararnar. Tær hava báðar vunnið sær pláss í HM-hópinum eftir fleiri ár uttanfyri.