Stóri munurin kom óvart á

Tað var ikki tí, at føroysku kvinnurnar ikki vóru ávaraðar frammanundan. Týska maskinan hevði gresja seg ígjøgnum Uruguai, Ísland og Serbia í bólkaspælinum, og heimaliðið var bæði úthvílt og motiverað til fyrsta dystin í miðumfarinum ímóti Føroyum.

Kortini koma tað onkursvegna eitt sindur óvart á, at munurin á liðunum var so stórur, helt Rannvá Olsen.

 - Vit vistu, at tær komu við stórum fysikki, men at tað var so stórur munur á okkum, tað haldi eg kanska kom eitt sindur sum eitt sjokk, segði vongurin, sum skoraði fýra ferðir upp á sínar seks royndir ímóti týska málinum.

 - Men eg haldi, at vit gera nógv góð ting, og so mugu vit fara at hyggja upp á tað, sum vit skulu rætta upp á.

Føroyar var á odda við einum nakrar ferðir fyrsta korterið, men tá heimaliðið fekk verjuspælið at sita, stungu fleiri dýr mistøk seg upp. Týskland skoraði fleiri ferðir í tómt mál, og longu í steðginum var dysturin í roynd og veru avgjørdur.

Kortini góvust føroyingarnir ongantíð at stríðast, og sum seinni hálvleikur leið, fingu fleiri av teimum føstu hvíld, meðan aðrar fingu spíska sær bóltfølingina til dystirnar ímóti Serbia (hósdagin) og Íslandi (leygarkvøldið).