Vánaligt verjuspæl kostar sigurin

Føroyar høvdu kjansin at koma heilt nær íslendingum, tá dysturin í Westfalenhalle nærkaðist endanum, men misnýttir kjansir og onnur mistøk gjørdi, at tað akkurát ikki gekk. 

Tað var kortini ikki høvuðsorsøkin til, at heimsmeistarakappingin endaði við tapi og vónbrotnum spælarum. Heldur var tað verjuspælið fyrsta korterið, sum kostaði Føroyum sigurin, helt venjarin Claus Mogensen.

 - Vit fáa als ikki tak á í verjuspælinum fyrstu 15 minuttirnar. Vit vóru als ikki nóg góðar, og Ísland slapp seks mál framum okkum, segði venjarin.

 - Vit eru við at koma afturí aftur nakrar ferðir, men tá skal alt likasum hepnast.

Tað gjørdi tað ongantíð heilt. Føroyar nærkaðust tvær ferðir, og munurin tódnaði niður í tvey, men í avgerandi støðum misnýttu fleiri spælarar stórar kjansir, og so vann Ísland 33-30 og fekk síni fyrstu stig í miðumfarinum.