Pensjónsaldurin hækkar eisini hjá nøkrum landsstýrisfólkum

Øll landsstýrisfólk skulu nú hava sama pensjónsaldur sum onnur í Føroyum.

Løgmaður hevur borið løgtinginum uppskot, sum sigur, at 67 ára pensjónsaldurin hjá landsstýrisfólkum, sum vóru fyri 15. september 2015, verður broyttur til vanliga fólkapensjónsaldurin.

Tey, sum vóru landsstýrisfólk fyri 15. september í 2015, fáa nú sama pensjónsaldur sum onnur.

Tey, sum eru vorðin landsstýrisfólk eftir 15. september 2015, fáa tað longu sum er. 

Orsøkin til uppskotið, sigur løgmaður, eru atfinningar um, at pensjónsaldurin hjá øllum landsstýrisfólkum ikki hækkar, tá hann hækkar hjá øðrum.

Lógarbroyting kemur í gildi dagin eftir, at hon er kunngjørd.

Pensjónsaldur hækkar 

Pensjónsaldurin skal annars hækka upp í 69 ár.

Tað uppskotið kom eisini í tingið í gjár.

Pensjónsaldurin er 67,5 ár í dag. Og longu nú er ásett, at hann verður 68 ár í 2030.

Við nýggja lógaruppskotinum hækkar pensjónsaldurin upp í 68,5 ár í 2035.

Síðani verður meira ferð sett á, pensjónsaldurin verður 69 ár longu í 2038.

Sambært lógaruppskotinum skal avgerast í seinasta lagi 1. januar í 2031, hvør pensjónsaldurin verður í 2041 og í seinasta lagi 1. januar í 2034 skal avgerast, hvør hann verður 2044.